انتخبونى وسيبونى انام

السيدات والسادة الاعضاء الكرام بعد ان عملنا حزب وتفرع منه جمعية وربنا يستر
مايتفرعش منه حاجات تانية ونقدر نلم الموضوع ونركز فى حاجة اصل الموضوع
اتبعتر مننا اوى المهم
ومافيش احسن من المهم .............
كنت عماله افكر هو انا لما أرشح نفسى لعضوية مجلس الشعب أختار رمز
أيه ...............
رمز الجمل ولا المسدس ولا الجمل ولا العنب ولا البلح ولا الفيل
ولا النخلة
الصراحة أحترت والموضوع مش ناقص توهان .............
بس انا لازم أرشح نفسى لعضوية مجلس الشعب عشان يبقى لحزبنا صوت فى هذا
المجلس الموقر
ونقدر نوصل صوتنا للمسئولين وكمان دة بينى وبينكم أتمتع بالحصانة البرطمانية هو
أنا ماليش نفس
ولا اية ................
حد عنده اعتراض ؟
ومن موقعى هذا أتوجة الى السادة الاعضاء بالتكرم والتوجة الى صناديق الاقتراع
وانتخابى واعدكم بصرف اتنين كيلو كباب وكفتة لكل من ضحى وخرج من بيته
واعطانى صوتة
تنتخبوا مين رئيسة حزب الاحلام
انتخبوا من يمثلكم بلحة يابلحة انتخبوا رمز البلحة
انتخبونى وسيبونى أنام شوية أصل النوم ناقح عليا واو واوا لمؤاخذة بتاوب
روحوا انتخبونى وأوعوا تناموا يلا تصبحوا على خير
انتخبونى وسيبونى أنام

صعيدى رايح جاى

السلام عليكم .... بعد الموضوع النكد اللى فات ..... موضوع العنوسة وهمومه وأيامه عاوزة ياجماعة أتكلم
فى موضوع شخصى امال انا عاملة الحزب ده لية هتقولولى هو ده حزب والدك ولا ايه ؟
بس معلش استحملونى
كلمتين واقفين في زوري ولازم يخرجوا ............
خمس عرسان يطفشوا ياجدعان .... وكلهم يمشوا بلا حس ولا خبر ... الصراحة انا مش لاقية اى تفسير
منطقى
واسأل هم الشباب عاوزين نانسى عجرم .... ماينفعشى زينات صدقى ولا خيرية احمد لازم تكون امورة وننوسة
الشباب ياجماعة بقى سطحى جدا ... والعينة بينة ..........
عاوزين واحدة روشة ودلع ايه . وأختكم مالهاش فى الدلع ولا الروشنة وبموت فى الصراحة يعنى
عاملة ذي القطر ... يعنى كله يوسع ... كله يغور من قدامى
لدرجه ان واحد من الاخوة المحترمين قاللى ... انتى حضرتك شبه واحد صعيدى صاحبى
رحت قلت له ...... أبقى سلملى عليه . وهكذا اختكم ياحضرات الاعضاء
ماذا تفعل لو كنت مكانى ...... يلا انا مش لاقية علامة الاستفهام لو حد لا قاها يجيبها ياولاد الحلال

المرأة المنتظرة

اعضاء الحزب الموقر
اليوم سنناقش قضية تهمنى وتهم فتيات مصر اللاتى يتظرن قطار الزواج الذى اصبح من المستحيلات
فى عصر تسود فيه الماديات والفساد بكل انواعه ... أخلاقى ... إجتماعى .... إقتصادى
وترك ورائه فتيات منتظرات متألمات لا أحد يعلم مابداخلهمن من مشاعر الألم والوحدة
انهن منتظرات ليس شئ آخر
قررنا نحن على هامش جدول أعمال الحزب ان ننشئ لهن
جمعية المنتظرات ....تقوم هذة الجمعية بتقديم المساندة لهن والاستفادة من من فراغهن العاطفى
لماذا تظل المرأة تقاسى الأمرين للحصول على الزوج المنتظر
لماذا نحكم على المرأة الغير متزوجة بالدفن ؟
إنى لا أدعوا للفجور ولكنىأدعو لإنشاء جمعية لهن تناقش قضايهن و إدماجهن فى
الأنشطة الخيرية
ويجدون من يتكلمون معه ويشكون له همومهن وإخراج الفتيات من عنق الزجاجة
يعنى إللى ماتجوزتش تروح تشوفلها موتة
ياجماعة عاوزين وقفة مع هذة المرأة وعدم تجاهلها وإنشاء جمعية تختص لحل مشاكل المرأة
المنتظرة
يابنات مصر تجمعن .. تشجعن ... قفن بجانب أنفسكن
إننا نملك بركان من المشاعر والاحاسيس إن أستغلت ستصنع المعجزات لهذا الوطن
ولا تنسوا إننا ثمرة الفساد الاجتماعى والاخلاقى والفضائيات والفيديو كليب
وثمرة ليس لها اى ذنب نحن ثمرة تحتاج الى عناية نحن ثمرة تحتاج الى توجية نفسى وإجتماعى
لمواجهة المجتمع الظالم
نحن ثمرة تحتاج الى معجزة

فاصل ونعود

حزب الأحلام الديموقراطى
ديموقراطية - نوم-سياسة- عراقة -صدارة - كل إللى نفسك فيه عندنا هتلاقيه
حزب الأحلام الديموقراطى
حزب لن تجد له مثيل ,...حزب يحل المشاكل بلا أى خسائر
حزب الأحلام الديموقراطى
به كل المقومات الحزبية التى لا يعلمها أحد إلا الله
حزب الأحلام الديموقراطى
أحلم وأتهنى ونام وأتغطى كويس عشان الكوابيس
حزب الأحلام الديموقراطى
رئيسته نائمه وبتاخد تعسيلة بين النوم
رئيسة حزب الاحلام امرأة فوق العادة إنها دائما وراء المشاكل تحلها وهى نائمة بكل ضمير
حزب الأحلام الديمقراطى
أعضائه ينامون .... يحلمون ويأكلون رز بلبن مع الملايكة ... وعندهم مقدرة جباررة لحل كل المشاكل المستعصية
وشعارنا ناس كتير نايمة على الارض
حزب الاحلام الديموقراطى
يتمتع بالشفافية يعنى احنا حاطين إزاز فاميه شفاف يخلى إللى برة يشوف إللى جوه
والصلاه على الزين ...والصلاه على الزين ...هات لنا منه باكو واتنين
بوووووووووووووووووووم
حزب الأحلام الديموقراطى
معانا هاتقدر تغمض عينيك

العباسية للجميع

فى ظل المحسوبية والناس اللى هية نرجو تطوير مستشفى العباسية
أعضاء الحزب الكرام وعضواتة الجميلات سأعرض عليكم موضوع غاية في الأهمية
هذا الموضوع سيُناقش على هامش المشكلات التي طُرحت في جدول أعمال الحزب
وهو............تحويل اسم مستشفى العباسية الى مستشفى
المدينة الفاضلة
نعم احلم بتغيير هذا الاسم ، وأحلم بأن يولي السادة المسئولين الأهتمام بهذا الصرح العظيم الذى اصبح يخدم
ثلاث تربع هذا الشعب العظيم فى ظل الضغوط النفسية والعصبية والمحسوبيه وضياع الهوية واللاشئ
فاصبح المواطن المصرى يملك ربع فقط غير ضارب وممكن يلسع فى اى لحظة
لذلك أدعوا السادة المسئولين للأهتمام بهذا المكان وتنمية الاستثمارات به فهو المستقبل
والله ولي التوفيق
وشكرا

استفتاء على اختيار الحزب

أخواني أخواتي
اعضاء الحزب الموقر
اليوم سنناقش موضوع يهم الحزب ... وبناء على رغبه الاعضاء الاجلاء
اللى شاغلهم شعار الحزب ... زى ماأتعودنا ان كل حزب ليه شعار ياترى هيكون شعارنا ايه.؟؟؟؟
واحد نايم على السرير ، ولا واحد نايم على المكتب ، ولا زى الاخت ماقالت نقطه بيضة فى بحر الفساد الاسود
ولا ناس كتير نايمة وعمالة تحلم ... الواحد محتار انا رأيى نعمل استفتاء بس مش عاوزين تذوير
وعايزين نبعد عن الشعارات الرنانه .... اللى لا بتودى ولا بتجيب انتم اكيد عارفينها وشربتوا منها كتير
لان حزبنا نايم على روحة مش هيستحمل شعار من شعارات اليومين دول
تنبيه هام ممنوع التذوير فى الاستفتاء

افيشات الاحزاب

فيه ناس مش عاجبها الهدف الخامس ... انتم عايزين تفضلوا تحلمو علي طول ولا ايه
؟؟؟ ماهو لازم بعد مانحلم نفكر فى تحقيق أحلامنا وإلا ناخد قرص منوم عشان نفضل
نايمين ونحلم ونحلم ونحلم .......
وفى الآخر نلاقى نفسنا فى السرايا مع باشاوات الاحلام
الحزب بتاعنا هو الحزب الوحيد فى مصر والعالم العربي المعترف انه حزب الأحلام
وهذا بلا فخر ... كل الاحزاب التانية عامله نفسها انهم مصحصحين وهم فى الحقيقة
اسماء على ورق وعايشين فى الاوهام
نفسى الاقى حزب فعال ويساعد الناس ويتفاعل معهم لكن الواحد الصراحة مابيسمعشى
غير أسامى ... حتى أساميهم ماتشدش الواحد يعنى عايزين اسامى تشد الواحد كه ذى
إفيشات الأفلام يلا خلينا فى حالنا

اهداف الحزب

عدت من العمل وأشعر بالتعب الشديد وقلت أقعد أخطط للحزب ...
حزب الأحلام
أصل أهم حاجة لعمل اى شىء هو التخطيط .. ثم التخطيط .. ثم تحديد الأهداف
وأحنا قولنا أول هدف هو توفير سرير متحرك لكل مواطن
وتانى هدف أن تكون أحلامنا بلا حدود وبلاش مقوله أحلم على قدك دى
.. بلاش قيود
حتى فى الأحلام هتقيدونا .. أتقوا ربنا ... أعملوا حاجة بضمير بقى عايزين شوية
ضمير
0000
أما الهدف الثالث أن تكون احلامنا فى الخير ، وبلاش الشر يطلع
والأحلام الشرانية بلاش
منها أرجوكم الواحد مش عايز يصحى من النوم يلاقى نفسه فى السجن ..
يلا أسترها
يارب
الهدف الرابع إن أحلامنا تكون مشتركة وياريت توارد الأفكار
...
هيعمل شغل جميل اوى
الهدف الخامس أول مانصحى من الأحلام ياريت نحققها000000000

حزب جديد

هاأعمل حزب جديد أسميه حزب الأحلام وكل اعضاء الحزب يناموا ويحلموا احلام سعيدة
احلام سعيدة للبلد والشعب الغلبان اللى هيشحتوا عليه قريب.......
.
واول الاحلام رغيف العيش .... وثانى الاحلام توظيف الشباب وتوفير فرص العمل لهم
عشان يعرفوا يتـأهلوا ونطلع من مشكلة العنوسة اللى استشرت فى البلد والاسعار تثبت
شويتين وبلاش كل يوم الاسعار ولا كل ساعة تزيد الضعف
حرام كفاية الناس المفروض تعمل ايه ؟؟؟؟؟؟؟؟؟؟يالا ربنا يستر......
......
والبهوات الوزرا اللى قاعدين على الكراسى يصحصحوا مع الشعب ويتابعوا مشاكلة
وآهاته
ده بيتهيألى شغلتهم ولا ليهم شغلة تانية بعد الضهر ياله ماحدش يعرف ظروف حد

طوابير فى كل حتة

ايه رايكم فى موضوع الحزب ده .؟؟؟ نعمل حزب ونحل فيه مشاكلنا ...
بجد مش تهريج ...
نفسى حد يسمعنا مش مديها طناش ذى خالتكم اللى انتم عارفينها
نفسى الاقى الفانوس السحرى ويطلع منه الجنى
ويقول شبيك لبيك عبدك وبين ايديك .......
.... نفسى حد مظبوط فى البلد يقولى نفسك فى ايه اقوم أرد عليه ..........كمانانا .... بس ده حلم .... ولا بلاش نحلم .... ده ساعات الواحد بيحس انهم منعوا الاحلام كمان ..
... ربنا يستر.
اصل كل حاجة فى البلد عمالة تخلص وكل حاجة بقت بالطوابير .... العيش والعمل والزواج وكل حاجة اقف فى الطابور لحد ماييجي عليك الدور ... امتى ربنا يتوب علينا
ياااااااااااالا ربنا يسترها
وتلاقى الف من يزاحمك فى الطابور ويزقك .... حتى الشغل بقى عامل زى طابور العيش حتى لوكانتالشغلانة اى كلام تلاقى الف من يزاحمك ويقرفك فى عشتك .... هذه هى الدنيا ام هذه هى مصر ؟؟؟؟

رفات

متى سترتاحى يانفسى متى ستهدأى من كل هذة الاشياء متى ستتنهى كل المشكلات

هل عندما اصبح رفات ام هل عندما سأتخلص من كل الملاعين الذين فى الارض يدى

ترتعش فى الهواءثم تهبط فى الارض وقد فارقت الحياة عيناى تسمرتا الى فوق تنزل

منها دماء بدل الدموع الدماء تخرج من عينى جسدى يرتفع الى اعلى مكان جسدى يريد ان يعلو ولكنه يهبط فى الشهوات يهبط من الهموم يهبط فى بئر الاحتياج يهبط والكل

يركله باقدامه يهبط ويهبط والكل ينظر الى هبوطه فيسارعون بحفر حفرة لدفنه فى

التراب فهو تراب ولابد ان يعود الى تراب لابد ان يختلط بالتراب هل سمعتم عن شهوة لمس التراب انها تجتاحنى الان ان المس التراب ويلمسنى ان ااصبح انا والترب كتلة

واحدة هل سترتاحى يانفس اعلم كم قاسى هذا الكلام وكم لعين اعلم كم القرف الذى

اشعره عندما تقع عينى على كل هذا الهراء الدنيوى كيف لى ان أعيش على هذة الارض

وانا أكرة كل زرة بها اكره حتى البوح بمانفسى اكره نفسى وروحى ايضا اكرهها حتى

اللعين الذى يقول انه يحبنى لا أصدقه ام ماذا ؟عله القارب الوحيد لنجاتى من لا شئ او عله الثقل الذى سيوقعنى اكتر فيما انا فيه هل انا شكاكة وكل من حولى شكاكين ايضا

الكل يشك فى الاخر اسنانى تتساقط من كثرة الشك كل شئ يريد ان يهرب الى حيث لا

رجعة فالكل الى زوال وفناء لما كل هذة الحيرة فلتتركى كل شىء يذهب الى حال سبيله فلتتركى كل شئ يذهب الى الجحيم وهذة المنيرة اللعينه لابد انه سيأتى يوم لتتمزق اوصالها لابد سيأتى يوم وتتبخر لابد سيأتى يوم وتصبح لاشئ فأكيد النهاية تنتظرها اميد هيجى يوم ومش هتقدر تفتح عنيها اكيد فى يوم هتصبح رماد اكيد اكيد كل شئ اكيد الم يحن وقت فراقك ايتها اللعينه الم يحن وقت موتك الم يحن لكى ان تموتى وتصبحى مجرد رماد الم يحن ان تصبحى مجرد رمال الم يحن تخلدى فى نار جهنم لتأكلك النيران مثلما تأذى من أفعالك كل هؤلاء البشر حتى هذة الكلمات خسارة فيك نعم خسارة فقد تخلدك هذة الكلمات وتصبحى اسطورة قذرة على مر السنين الا تعلمين انك سيط من الظلم سيط نارى ملعون سيط من سياط النار انك لست الا امرأة ملعون تلعنها الالسن مائة مرة سيأتى يوم ايتها الملعون وتأخذى مقلب عمرك فالجحيم سيذهب لا محالة الى الجحيم

دكتور نفسانى حضرتك

اردت البوح الان اريد ان اقول اشياء تحزننى تجعلنى اصرخ انى بحق لا احتمل كل هذا الخداع وكيف اسمح لاحد ان يخدعنى ان رأيته ساركله الى الموت

اشياء داخلى تصرخ تئن اجد نفسى مجبرة على البوح حتى وان كان لا احد يسمعنى حتى ان كانت ستدفن كلماتى معى وستحرق بجانبى علنى ان استطعت الصراخ سأرتاح او علنى ان استطعت فعل شئ جديد شعرت بالراحة ولكن ماهذا الشئ الجديد الذى عليا فعله الان ابحث عن عمل اخر بعد الظهر حتى اتوقف عن التفكير او ابحث عن اى شئ افعل كل هفوة افكر بها انى حساسه جدا اعلم هذا جيد بل حساسه بشكل مذرى كم اتمنى ان اتخلص من هذة الحساسيه المفرطة ولكن كيف انى بحق حساسه بل مجنونة حساسيه وليتنى ابكى ولكن كل شئ داخلى يبكى الا عينى ان بكيت قد اشعر بالراحة ان بكيت قد ارتاح

ولكن من حقى اصرخ وان صرخت هل من حقى ابكى سأحاول غدا ان اذهب الى مسجد النور او اذهب بعد غد الجمعة فدائما ماارتاح فيه بقالى كتير مارحتش سأحاول ايجاد عمل بعد الظهر لاتوقف عن التفكير والا مت وانا افكر فى الاوهام لا اعلم ماذا افعل بحق الحياة

اقولكم اللى يلاقى دكتور نفسى يجيبه لى ويخلص

ايميلى smisho88@yahoo.com

ولكم كل الشكر

امضاء واحدة مكتئبه

شات مع نفسى

اه استريحت بعد البوست اللى فات يلا هعاود الكلام تانى مع نفسى

ايه اللى مزهقك ياحتة جوافة

انا =مش عارفة بس اتخنقت مرة واحة كدة

انا العاقلة =من ايه حبيبه كلبى

انا =مرة واحدة كدة لقتنى مخنوقة وعايزة اتكلم مع حد يعرفنى اوى ويحسنى ودة للسف زى مانتى عارفة مش موجود

انا العاقلة = بصى دورى جوا نفسك على حاجة بتحبك وعايزة تساعدك اكيد هتلاقيها فى نفسك ان كان الواقع حرمك من ابسط حقوك انى تجدى الشخص اللى يفهمك افهمى انتى نفسك

انا =طب افهمها ازاى

انا العاقلة = حاولى تعرفى انتى عايزة ايه وتعمليه

انا = انا كنت بمشى ورا عقلى وبفكر بعقلانيه جدا دلوقت عايزة اجرب امشى بقلبى واخليه هو اللى يمشينى

انا العاقلة = ها وبعدين

انا = خليت قلبى يتكلم شويه واعرف عايز ايه لقتنى همشى على هوايا وانا مش كدة

انا العاقلة = ها وبعدين

انا = مشيت وراا قلبى مالقتش غير كسرة قلب وحزن

انا العاقلة =واخرة الحيرة دى هتعملى ايه قلبك وعقلك نويتى تعملى ايه

انا = مش عارفة نفسى اجرب مشوار المشى ورا قلبى لحد الاخر لانى مشيت ورا عقلى كتير ماخدتش منه حاجة غير وجع الدماغ وانا دلوقت بدور على حب صادق عشان كدة هستعمل قلبى

انا العاقلة مسكت انا المجنونة وضربوا بعض بالشلاليت

لان انا العاقلة قربت تتعدى من انا المجنونة والاتنين عاوزين يفرقعوا فى بعض

فضفة وحبه شخبطة

السلام عليكم

انا جايه النهاردة افضفض وبس مش اكتر

بجد النهاردة حسيت بخنقة رهيبه بل شنيعة اتخنقت حسيت انى عمرى بيجرى ومش عارف اعمل حاجة واللى ابات فيه اصبح فيه بجد احساس مؤلم انك مش يكون عندك امل انك تستقر وتحس بالاستقرار النفسى فى حياتك دة اللى قلقنى اوى قلقانة افضل طول عمرى اكون وحيدة كدة ومش لايقة حد اكلمه ويفهمنى دة اللى راعبنى انى ممكن افضل انسان مش لاقى حد يفهمنى

وانا اعمل ايه عشان الناس تفهمنى بجد انا بدعى ربنا يشيل الاحساس الزفت دة من دماغى

وافكر وفيها ايه لو مالقتش حد يفهمنى فى ستين داهيه افهم نفسى انا بقى هو حد ليه عندى حاجة ولا ايه

يعنى وفيها ايه مش لاقيه حب فيها ايه يعنى لما اعيش من غير حب المهم احب نفسى واحافظ على شويه العقل اللى فى دماغى ممكن ينفعوا وقت الزنقة

وفيها ايه اللى اصغر منى هيتجوزوا فيها ايه فى ستين داهيه المهم احافظ على دماغى هى اللى هتبقى لى

وفيها ايه شايفة فى الشغل الامرين والمديرة بنت التيييييييييييييييييييييييييييييييت

موريانى العين الحمرا وحاسه انى هطلع منها على نقالة وفيها ايه يعنى يمكن الواحد يموت ويستريح المهم دلوقت انى احافظ على شويه الدماغ

فيها ايه يعنى ناس عاوزة تضحك عليا ويفهمونى انهم بيحبونى واديهم انا باللى فى رجلى فيها ايه يعنى

فيها ايه الشباب عاوزين بت مدندشه وانا حاطة طاجن ستى على دماغى وماشيه بيه فيها ايه يولعوا راخرين هو انا كدة بت عاملة زى العمل الردى دة ذنبى

فيها ايه لما يكون جوايا كل الصراعات دى ولسه عايشه او عاملة نفسى عايشه فيها ايه لما تكون مشاكلنا على الهامش لا حد بيسمع ولا حد شايف اللى احنا فيه وكل مااحكى لماما على مشكلتى تقولى ماتتكلميش

المفروض اسكت لا مش قادرة اسكت مش قادرة اعصابى هتفرقع وانا مش هسيب نفسى افرقع

من الاخر نفسك فى ايه يانفسى

نفسى اعيش نفسى يبقى لى اسرة ولاد وعيلة

نفسى مش الاقى نفسى وحيدة

دة اللى نفسى فيه صعب تحقيقة ولا الموت اسهل بكتير من المتطلبات دى